திருச்சியில் உள்ள எலந்தபட்டி கிராமத்தில் ஒலிம்பிக் பயிற்சி அகாடமிக்கான ஆரம்பகட்ட பணிகளை தமிழ்நாடு விளையாட்டு மேம்பாட்டு ஆணையம் (SDAT) தொடங்கியுள்ளது. ரூ.150 கோடி மதிப்பீட்டில் திருவெறும்பூர் அருகே 47.8 ஏக்கர் நிலப்பரப்பில் இரண்டு கட்டங்களாக இத்திட்டம் செயல்படுத்தப்படும். நகராட்சி நிர்வாக அமைச்சர் கே.என். நேரு மற்றும் பள்ளிக் கல்வி அமைச்சர் அன்பில் மகேஷ் பொய்யாமொழி ஆகியோர் கட்டம் I இன் கீழ் 15க்கும் மேற்பட்ட உட்புற மற்றும் வெளிப்புற விளையாட்டு உள்கட்டமைப்புகளுக்கு அடிக்கல் நாட்டினர். "முதல் கட்டத்தை 18 மாதங்களுக்குள் முடிக்க கட்டுமானப் பணிகள் விரைவுபடுத்தப்படும்" என்று நேரு கூறினார். முதல் கட்டத்திற்கு 50 கோடியும், இரண்டாம் கட்டத்திற்கு 100 கோடியும் ஒதுக்கப்பட்டது. சுமார் 71,000 சதுர அடி பரப்பளவில் உட்புற விளையாட்டு அரங்கம், உடற்பயிற்சி வளாகம் மற்றும் நீச்சல் குளம் கட்டப்படும் என்று அதிகாரிகள் தெரிவித்தனர். ஒலிம்பிக் தரத்திலான கூடைப்பந்து, பூப்பந்து மற்றும் கைப்பந்து மைதானங்கள் உருவாக்கப்படும் என்று விளையாட்டுத் துறை தெரிவித்துள்ளது. கலை ஜிம்னாஸ்டிக்ஸ், மல்யுத்தம், குத்துச்சண்டை மற்றும் பளு தூக்குதல் ஆகியவற்றுக்கான உள்கட்டமைப்பு வசதிகளும் ஏற்படுத்தப்படும். முதலாம் கட்டத்தின் கீழ் ஒலிம்பிக் தர உட்புற நீச்சல் குளம் (25X50 மீ), நிலையான கால்பந்து மைதானம் (புல்) மற்றும் எட்டு வழி செயற்கை ஓடுதளம் (400 மீ) ஆகியவை கட்டப்படும். "முதல் கட்டம் முடிந்த பின்னரே இரண்டாம் கட்டம் தொடங்கும்" என்று தமிழ்நாடு விளையாட்டு மேம்பாட்டு ஆணையம் தெரிவித்துள்ளது. சைக்கிள் ஓட்டுதலுக்கான velodrome track, கிரிக்கெட் மைதானம், கைப்பந்து கோர்ட்டுகள், டென்னிஸ் கோர்ட்டுகள் மற்றும் உட்புற வில்வித்தை போன்ற உள்கட்டமைப்புகள் இரண்டாம் கட்டத்தில் வரும். அதே நேரத்தில், திருவெறும்பூருக்கு அருகிலுள்ள சூரியூர் கிராமத்தில் முதலமைச்சரின் மினி ஸ்டேடியம் மற்றும் ஜல்லிக்கட்டு அரங்கத்திற்கான டெண்டரை தமிழ்நாடு விளையாட்டு மேம்பாட்டு ஆணையம் வெளியிட்டுள்ளது. சூரியூர் ஒவ்வொரு ஆண்டும் பொங்கல் பண்டிகையின் போது திருச்சியின் முதல் ஒழுங்கமைக்கப்பட்ட ஜல்லிக்கட்டை நடத்துகிறது. கட்டுமானத்திற்காக மாநில அரசு 3 கோடி ரூபாய் ஒதுக்கியுள்ளது. மினி ஸ்டேடியத்தில் கபடி, கைப்பந்து மற்றும் தடகள வசதிகள் இருக்கும். திருச்சி ஒலிம்பிக் அகாடமிக்கான பணிகள்: மொத்த செலவு: ரூ.150 கோடி பரப்பளவு: 47.8 ஏக்கர் இடம்: எலந்தப்பட்டி, திருவெறும்பூர். திட்டச் செலவு: கட்டம் I: ரூ.50 கோடி காலம்: 18 மாதங்கள் கட்டம் I இல் மொத்த விளையாட்டு உள்கட்டமைப்பு: 15+ கட்டம் I இல் சேர்க்கப்பட்டுள்ள சில விளையாட்டுகள்: 1. பேட்மின்டன் 2. கைப்பந்து 3. கூடைப்பந்து 4. நீச்சல் 5. ஜிம்னாஸ்டிக்ஸ் சூரியூரில் ஜல்லிக்கட்டு அரங்கம் மற்றும் மினி மைதானம்: செலவு: ரூ. 3 கோடி வசதிகள்: 1. ஜல்லிக்கட்டு அரங்கம் 2. கபடி மைதானம் 3. கைப்பந்து மைதானம் 4. தடகளம்  

பொன்மலை ஜி- காா்னா் பகுதியில் அடிக்கடி ஏற்படும் விபத்துகளைத் தடுக்க மாற்று வழிகள் குறித்து தேசிய நெடுஞ்சாலை, ரயில்வே அதிகாரிகளுடன் துரை வைகோ எம்.பி. சனிக்கிழமை ஆய்வு செய்தாா். சென்னை- திருச்சி- மதுரை தேசிய நெடுஞ்சாலையில் பொன்மலை ஜி. காா்னா் பகுதியில் அணுகுச் சாலையை பொன்மலை பகுதி பொதுமக்கள், சாலையின் இருபுறமும் உள்ள 15-க்கும் மேற்பட்ட குடியிருப்புகளின் மக்கள் என ஆயிரக்கணக்கானோா் பயன்படுத்துகின்றனா். ஒருவழிப்பாதையாக பயன்படுத்த வேண்டிய இந்தச் சாலையில் இருவழியாக வாகனங்கள் செல்வதால் அடிக்கடி விபத்துகள் ஏற்படுகின்றன. இதைத் தடுக்க மேம்பாலமோ, சுரங்க வழிப்பாதையோ ஏற்படுத்த வேண்டும் என கடந்த 15 ஆண்டுகளாக இப்பகுதி மக்கள் கோரிக்கை விடுத்து வந்த நிலையில், இப்பிரச்னையை திருச்சி எம்பி துரை வைகோவின் கவனத்துக்கு சமூக ஆா்வலா்கள் கொண்டு சென்றனா். இதன்பேரில் துரை வைகோ எம்பி திருச்சி ரயில்வே கோட்ட மேலாளா் அன்பழகன், தேசிய நெடுஞ்சாலை ஆணையத் திட்ட இயக்குநா் பிரவீன்குமாா் மற்றும் ரயில்வே, நெடுஞ்சாலை அதிகாரிகளுடன் ஜி- காா்னா் பகுதியில் சனிக்கிழமை ஆய்வு செய்த பின்னா் கூறியது: பொன்மலை ஜி- காா்னா் பகுதியில் மேம்பாலமோ, சுரங்கப் பாலமோ அமைக்க விரைந்து ஏற்பாடு செய்வேன். தேவையான நிலம் வழங்க ரயில்வே நிா்வாகம் தயாராக உள்ளது. ரயில்வே, தேசிய நெடுஞ்சாலை ஆணையம் என இரு தரப்புக்கும் இடையே இணைப்புப் பாலமாக இருந்து இப் பிரச்னைக்கு விரைந்து தீா்வு காணப்படும். திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

திருச்சி மாவட்டத்தைச் சோ்ந்த இளைஞா்களுக்கு மாதம் ரூ.12 ஆயிரம் உதவித் தொகை பெற்று பயிற்சி பெறும் வகையில் தொழிற்பழகுநா் சோ்க்கை முகாம் ஜன.31-ஆம் தேதி நடத்தப்படவுள்ளது. திறன் மேம்பாட்டு மற்றும் தொழில் முனைவு அமைச்சரகம் மற்றும் வேலைவாய்ப்பு பயிற்சித் துறை சாா்பில், சிறு மற்றும் குறு தொழில் நிறுவனங்களில் தொழிற் பழகுநா்களை நியமனம் செய்வதை ஊக்குவிக்கும் விதமாக, திருச்சி மாவட்டத்தில் மண்டல அளவிலான தொழிற்பழகுநா் சோ்க்கை முகாம் வரும் ஜன. 31-ஆம் தேதி காலை 10 மணி அளவில் திருச்சி அரசினா் தொழிற்பயிற்சி நிலையத்தில் நடைபெறுகிறது. இந்த சோ்க்கை முகாமில் இதுவரை தொழிற்பழகுநா் பயிற்சி (அப்ரண்டிஸ்) பெறாதவா்களை மற்றும் 2021-22, 2022-23, 2023-24 ஆகிய வருடங்களில் தோ்ச்சி பெற்ற அரசு மற்றும் தனியாா் ஐ.டி.ஐ பயின்றவா்கள், 8ம் வகுப்பு தோ்ச்சி மற்றும் 10,12 ஆம் வகுப்பு தோ்ச்சி அல்லது தோல்வியடைந்த இளைஞா்கள் (இருபாலரும்) மற்றும் பட்டம், பட்டயப் படிப்பு முடித்த அனைவரும் கலந்து கொள்ளலாம். இந்தப் பயிற்சியின்போது, உதவித் தொகையாக மாதம் ரூ. 7,700 முதல் ரூ. 12,000 வரை நிறுவனத்தாரால் வழங்கப்படும். தொழிற்பழகுநா் சட்டத்தின் படி இந்த நிறுவனங்களில் சோ்ந்து ஓராண்டு தொழிற்பழகுநா் பயிற்சி பெறுபவா்களுக்கு மத்திய அரசின் தேசிய தொழிற் பழகுநா் சான்றிதழ் வழங்கப்படும். எனவே, மாணவா்கள் இந்த சோ்க்கை முகாமில் கலந்து கொண்டு பயன்பெறலாம். கூடுதல், விவரங்களை அறிய திருவெறும்பூரில் உள்ள அரசு தொழிற்பயிற்சி நிலைய வளாகத்தில் உள்ள மாவட்ட திறன் பயிற்சி அலுவலகத்தை நேரிலோ அல்லது 94436-44967, 0431-2553314 என்ற தொலைபேசி எண்ணிலோ தொடா்பு கொள்ளலாம் என ஆட்சியா் மா. பிரதீப்குமாா் தெரிவித்துள்ளாா். திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

பேருந்து நிறுத்தத்தில் இருந்தபடியே அரசுப் பேருந்துகளில் எந்தப் பேருந்து, எந்த நேரத்துக்கு நாம் நிற்கும் நிறுத்தத்துக்கு வந்து சேரும் என்பதை டிஜிட்டல் தொழில்நுட்பத்தில் காணும் திட்டம், பரிசோதனை அடிப்படையில் சமயபுரம் வழித்தடத்தில் தொடங்கப்பட்டுள்ளது. திருச்சிக்கு வந்துள்ள உதவி ஆட்சியா் (பயிற்சி) அமித்குப்தா, கணினி தொழில்நுட்பக் கல்வி பயின்றவா். எனவே, அவரிடம் திருச்சி மாவட்ட ஆட்சியா் மா. பிரதீப்குமாா், பேருந்து பயணிகளுக்கு உதவிடும் வகையில் இத் திட்டத்தை செயல்படுத்த முன்னெடுப்புகளை மேற்கொள்ள அறிவுறுத்தினாா். இதையடுத்து, தனியாா் நிறுவனத்தின் பங்களிப்புடன், பல்வேறு அரசு துறைகள் ஆகியவை இணைந்து இத் திட்டத்தை செயல்படுத்த நடவடிக்கை எடுத்துள்ளாா் அமித்குப்தா. இதன்படி, பரிசோதனை முயற்சியாக சமயபுரம் வழித்தடத்தில் 5 பேருந்து நிறுத்தங்களில் இந்த தொழில்நுட்ப வசதி வெள்ளிக்கிழமை முதல் பயன்பாட்டுக்கு வந்துள்ளது. திருவானைக்காவல் பேருந்து நிறுத்தத்தில் நிறுவப்பட்டுள்ள நேரம் அறியும் டிஜிட்டல் அறிவிப்புப் பலகையை நகராட்சி நிா்வாகத் துறை அமைச்சா் கே.என். நேரு திறந்து வைத்து, மாவட்ட நிா்வாகத்தின் முயற்சிக்கு பாராட்டு தெரிவித்தாா். இது தொடா்பாக, உதவி ஆட்சியா் (பயிற்சி) அமித்குப்தா கூறுகையில், 5 இடங்களில் பரிசோதனை முயற்சியாக இந்த அறிவிப்புப் பலகை நிறுவப்பட்டுள்ளது. இதற்காக 42 அரசுப் பேருந்துகளில் ஜிபிஎஸ் தொழில்நுட்பம் பொருத்தப்பட்டுள்ளது. சமயபுரம் வழித்தடத்தில் அறிவிப்புப் பலகையில் ஒவ்வொரு பேருந்தின் எண், வழித்தடம், நேரம் மற்றும் சேருமிடம் உள்ளிட்ட விவரங்கள் ஒளிக்காட்சியாக இடம்பெறும். இது மக்களின் பயணத்தை எளிதாக்கும். இந்தப் பரிசோதனை முயற்சி பயணிகளிடையே பெறும் வரவேற்புக்கு தகுந்தபடி அனைத்து வழித்தடங்களிலும் இந்த வசதியை ஏற்படுத்தித்தரவும் திட்டமிடப்பட்டுள்ளது என்றாா் அவா். திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

திருச்சி சூரியூரில் ரூ.3 கோடிக்கு நிரந்தர ஜல்லிக்கட்டு ஸ்டேடியம் அமைக்கப்படுவதற்கு தமிழ்நாடு விளையாட்டு மேம்பாட்டு ஆணையம் ஒப்பந்தப்புள்ளி கோரியது ஒவ்வொரு ஆண்டும் மாட்டு பொங்கல் தினத்தன்று திருச்சி மாவட்டம் சூரியூரில் ஜல்லிக்கட்டு போட்டி நடைபெறும். திருச்சி மட்டுமல்லாது தஞ்சாவூர், அரியலூர், கரூர், புதுக்கோட்டை, பெரம்பலூர் உள்ளிட்ட மாவட்டங்களிலிருந்து மாடுகள் பெரிய சூரியூர் ஜல்லிக்கட்டு போட்டியில் பங்கேற்கும். இந்த ஆண்டு சூரியூரில் நடைபெற்ற ஜல்லிக்கட்டு போட்டியின் போது ஜல்லிக்கட்டு ஸ்டேடியம் அமைப்பதற்கான அரசாணையை அமைச்சர் அன்பில் மகேஷ் விழா குழுவினரிடம் வழங்கினார். மேலும், திருச்சி பெரிய சூரியூரில் ரூ.3 கோடி செலவில் ஜல்லிக்கட்டு ஸ்டேடியம் அமைக்கப்பட உள்ளது. ஜல்லிக்கட்டு போட்டிக்கு மட்டுமல்லாமல் பல்வேறு விளையாட்டுகள் விளையாடும் வகையில் ஒருங்கிணைந்த விளையாட்டு திடலாக அது அமையும். இன்னும் ஒரு மாத காலத்தில் அதற்கான பணிகள் தொடங்கும் என அமைச்சர் அன்பில் மகேஷ் தெரிவித்திருந்தார். இந்த நிலையில் ஜல்லிக்கட்டு ஸ்டேடியும் அமைப்பதற்கான தமிழ்நாடு விளையாட்டு மேம்பாட்டு ஆணையம் டெண்டர் கோரி உள்ளது. அதில் திருச்சி மாவட்டத்தில் உள்ள திருவெறும்பூர் சட்டமன்றத் தொகுதிக்குட்பட்ட சூரியூர் கிராமத்தில் முதலமைச்சர் மினி விளையாட்டு அரங்கம் மற்றும் ஜல்லிக்கட்டு அரங்கம் கட்டுவதற்கு பிப்ரவரி 04 மாலை 4.00 மணிக்குள் விண்ணப்பிக்கலாம் என தெரிவிக்கப்பட்டுள்ளது. மேலும் ஒப்பந்தம் வழங்கி தளத்தை ஒப்படைத்த நாளிலிருந்து 270 நாட்களில் பணியை முடிக்கவும் அறிவுறுத்தப்பட்டுள்ளது. ஏற்கனவே இன்று திருவெறும்பூரில் ஒலிம்பிக் அகாடமி பணிகள் அனைத்தும் இன்று தொடங்கப்பட்டுள்ளது. அதற்கான பணிகளை தொடங்க அடிக்கல் நாட்டப்பட்டுள்ளது . இந்நிலையில் திருவெறும்பூர் சட்டமன்ற தொகுதிக்கு உட்பட்ட சூரியூர் கிராமத்தில் விளையாட்டு திடல் அமைக்கப்பட இருக்கிறது. விரைவில் இதற்கான பணிகள் அனைத்தும் தொடங்கப்படும் என்று எதிர்பார்க்கப்படுகிறது. திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

தற்போது திருச்சி மத்திய பேருந்து நிலையம் போக்குவரத்து நெரிசலில் சிக்கி தவிக்கும் நிலையில் பஞ்சப்பூர் அருகே சுமார் 400 கோடி செலவில் ஒருங்கிணைந்த பேருந்து நிலையம் அமைக்கப்பட்டு வருகிறது. அந்த பேருந்து நிலையம் விரைவில் பயன்பாட்டுக்கு வர உள்ள நிலையில் அதில் உள்ள வசதிகள் என்னென்ன என்பது குறித்து சற்று விரிவாக பார்க்கலாம்.. தென் மாவட்டங்களில் வரும் சரக்கு வாகனங்கள் பேருந்துகள், திருச்சியை கடந்து தான் செல்கின்றன. அந்த வகையில் திருச்சி நகரின் மையப் பகுதியில் அமைந்துள்ள மத்திய பேருந்து நிலையம் மிக முக்கியமான ஜங்ஷன் ஆக இருக்கிறது. இதனால் நகரில் அடிக்கடி போக்குவரத்து நெரிசல் ஏற்பட்டு மக்கள் கடுமையாக பாதிக்கப்பட்டனர். இதனை அடுத்து திருச்சி புறநகர் பகுதியில் ஒருங்கிணைந்த பேருந்து நிலையம் அமைக்க வேண்டும் என கோரிக்கை எழுந்தது. இதனையடுத்து திருச்சி பஞ்சப்பூரில் சுமார் 400 கோடி ரூபாய் செலவில் ஒருங்கிணைந்த பேருந்து நிலையம் அமைக்க நடவடிக்கை எடுக்கப்பட்டு தற்போது அந்த பணிகள் வேகமாக நடைபெற்று வருகிறது. பஞ்சப்பூரில் ஏற்கனவே சரக்கு வாகன நிறுத்த முனையம், டைடல் பார்க், சோலார் திட்டங்கள் உள்ளிட்ட பல்வேறு திட்டங்கள் செயல்படுத்தப்பட்டு வரும் நிலையில் அதிநவீன வசதிகளுடன் ஒருங்கிணைந்த பேருந்து நிலையமும் அமைக்கப்படுகிறது. தற்போது கிட்டத்தட்ட 80 சதவீத பணிகள் நிறைவடைந்து இருக்கும் நிலையில் மீதமுள்ள பணிகளும் வேகமாக நடைபெற்று வருகிறது. இன்னும் இரண்டு மாதங்களுக்குள் இந்த பேருந்து நிலையத்தை திறப்பதற்கான நடவடிக்கை எடுக்கப்பட்டு வருகிறது. பேருந்து நிலையத்தின் சில பகுதிகளில் ஏசி வசதி, சர்வீஸ் சென்டர், நகரும் படிக்கட்டுகள், லிப்ட் வசதி, ஆம்னி பேருந்து நிறுத்தம், அரசு பேருந்து நிறுத்தம், உள்ளூர் பேருந்து நிறுத்தம், பயணிகளுக்கான ஓய்விடம், தங்குமிடம், உணவகம் உள்ளிட்ட பல்வேறு வசதிகள் செய்யப்பட இருக்கிறது. மேலும் பயணிகளுக்கான காத்திருப்பு அறைக்கு அருகே கழிவறை வசதிகள், அனைத்து பகுதிகளையும் கண்காணிக்கும் வகையில் கண்காணிப்பு கேமராக்கள், பயணிகளுக்கு உதவும் வகையில் உதவி மையங்கள் , எல்இடி திரைகள் அமைக்கும் பணி தற்போது தீவிரமாக நடைபெறுகிறது. மேலும் கூரை பகுதிகளில் led விளக்குகள், மாற்றுத் திறனாளிகள் பயணிக்கும் வகையில் பிரத்தியேகத் தடங்கள்,புல் வெளி பரப்புகள், பூங்காக்கள் உள்ளிட்டவற்றை அமைக்கும் பணிகளும் நடைபெற்று வருகிறது. ஏற்கனவே சென்னை கிளாம்பாக்கத்தில் தான் இது போன்ற அதிநவீன வசதிகள் இருக்கும் நிலையில் தமிழகத்தின் மத்திய பகுதியான திருச்சியிலும் இதே போல பேருந்து நிலையம் அமைக்கப்பட இருப்பது குறிப்பிடத்தக்கது. நேற்று தமிழ்நாடு நகராட்சி நிர்வாக துறை அமைச்சர் கேஎன் நேரு அங்கு அதிகாரிகளுடன் ஆய்வு செய்து கூடுதலாக அடிப்படை வசதிகள் மற்றும் கழிப்பிட வசதிகள் ஏற்படுத்தி தரவேண்டும் எனவும் பணிகளை விரைந்து முடிக்க வேண்டும் எனவும் அதிகாரிகளுக்கு உத்தரவிட்டார். இதனை அடுத்து விரைவில் இந்த பேருந்து நிலையம் மக்கள் பயன்பாட்டிற்கு வரும் என எதிர்பார்க்கப்படுகிறது. திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

திருச்சி மாநகரில் மெட்ரோ ரயில் திட்டங்களை செயல்படுத்துவது குறித்து சென்னை மெட்ரோ ரயில் லிமிடெட் நிறுவனம், கடந்த ஓராண்டுக்கு முன்பே விரிவான சாத்தியக்கூறு அறிக்கையை சமர்பித்த போதிலும், விரிவான திட்ட அறிக்கையை தொடங்கவில்லை.. இந்த திட்டத்திற்கு தமிழக அரசு முன்னுரிமை அளிக்கவில்லை என்று கூறப்படுகிறது. ஏனெனில் நிதியை ஏற்பாடு செய்வது சவாலானது என்கிறார்கள்.. அதேநேரம் கோவை மற்றும் மதுரை திட்டங்கள் மத்திய அரசு ஒப்புதல் அளித்தால் செயல்படுத்த அதிக வாய்ப்பு உள்ளது என்கிறார்கள். கோவையில் ரூ.10,740 கோடியிலும், மதுரைக்கு ரூ.11,340 கோடியிலும் செயல்படுத்தப்பட உள்ளது. இத்திட்டம் 3 ஆண்டுகளில் செயல்படுத்த அரசு திட்டமிட்டுள்ளது. இத்திட்டத்தை முறையாகச் செயல்படுத்துவதற்காக நில ஆர்ஜித பணிகள், சாலைகளில் மழைநீர் வடிகால், மின் கேபிள் ஆகியவைகளை முறையாக மாற்றிடும் வகையில் ஒன்றரை ஆண்டு முதல் 2 ஆண்டுகள் பணிகள் வரை நடைபெற உள்ளது. ஆனால் கோவை, மதுரையை போல் திருச்சியிலும் மெட்ரோ ரயில் அமைக்க அரசு முடிவு செய்துள்ளது. ஆனால் திருச்சிக்கு முன்னுரிமை கிடைக்க வாய்ப்பு இல்லை என்கிறார்கள். ஏனெனில் சென்னை மெட்ரோ ரயில் லிமிடெட் நிறுவனம் ஒரு வருடத்திற்கு முன்பு விரிவான சாத்தியக்கூறு அறிக்கையை முடித்துவிட்ட போதிலும், திருச்சி மெட்ரோ திட்டத்திற்கான விரிவான திட்ட அறிக்கையை உருவாக்கும் பணியை இன்னும் தொடங்கவில்லை. 2023 ம் ஆண்டு ஆகஸ்ட் மாதம் சமர்ப்பிக்கப்பட்ட DFR அறிக்கையில் , திருச்சியில் மெட்ரோ ரயில் வரும் என்கிற நம்பிக்கையை உறுதி செய்தாலும் எப்போது திட்டம் தொடங்கப்படும் என்று தெரியவில்லை.. ஏனெனில் இந்த திட்டத்திற்கு தமிழக அரசு முன்னுரிமை அளிக்கவில்லை என்று கூறப்படுகிறது. சென்னை, கோயம்புத்தூர் மற்றும் மதுரை மெட்ரோ திட்டங்களுக்கே தற்போது முன்னுரிமை அளிக்கப்பட்டு பணிகள் தொடங்கப்படுவதாக சென்னை மெட்ரோ நிறுவன வட்டாரங்கள் தெரிவித்தன. கோயம்புத்தூர் மற்றும் மதுரையில் மெட்ரோ திட்டங்களுக்கான சமீபத்திய ஆய்வுகள் மற்றும் ஆய்வுகள் நடத்தப்பட்டிருக்கிறது. ஆனால் திருச்சி மெட்ரோ விவகாரத்தில் அப்படி எந்த முன்னேற்றமும் இதுவரை ஏற்படவில்லை. திருச்சி மெட்ரோ ரயில் திட்டத்தின் மதிப்பிடப்பட்ட செலவு என்பது ₹10,917 கோடி ஆகும். திருச்சியில் மெட்ரோ வழித்தடங்களை செயல்படுத்துவதில் பெரிய தடைகள் எதுவும் இருக்காது என்று கூறிய சென்னை மெட்ரோ அதிகாரிகள் , அதேநேரம் திட்டத்திற்கான நிதியை ஏற்பாடு செய்வது ஒரு பெரிய சவாலாகவே உள்ளதாக கூறினார்கள். திருச்சி மெட்ரோ திட்டம் இன்னும் மாநில அரசால் விரைவுபடுத்தப்படவில்லை என்றும் இப்போதைக்கு, அது நிறுத்தி வைக்கப்பட்டுள்ளது என்றும் அதிகாரிகள் கூறினார்கள். திருச்சி நகரம் முழுவதும் 45 கி.மீ நீளமுள்ள இரண்டு மெட்ரோ வழித்தடங்கள் அமைக்கபட திட்டமிடப்பட்டள்ளது. சமயபுரத்தை வயலூருடன் இணைக்கும் 19 கி.மீ நீளமுள்ள காரிடார் ஒன்றில், 19 மெட்ரோ ரயில் நிலையங்களும், துவாக்குடியை பஞ்சப்பூருடன் இணைக்கும் 26 கி.மீ நீளத்திற்கு காரிடார் 2வில் 26 மெட்ரோ நிலையங்கள் அமையும் என்றும் அறிவிக்கப்பட்டிருந்தது. திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

1,000 ஆண்டு பொக்கிஷத்தை பாதுகாக்குமா தொல்லியல் துறைக்கு கோரிக்கை திருச்சி -- சென்னை தேசிய நெடுஞ்சாலையில், பெரம்பலுாரில் இருந்து, 18 கி.மீ., துாரத்தில் சாலையின் இடதுபுறம் அமைந்துள்ளது மங்கலமேடு கிராமம். இங்கிருந்து, அரை கி.மீ.,யில், வரலாற்று சிறப்புமிக்க ரஞ்சன்குடி கோட்டை உள்ளது. ரஞ்சன்குடி கிராமத்தில் கம்பீரமாய் உயர்ந்து நிற்கும் இக்கோட்டை, 1,000 ஆண்டுகள் பழமை வாய்ந்தது. கோட்டை பற்றிய முழு வரலாறு இதுவரை கண்டறியப்படவில்லை. பிரெஞ்சுக்காரர்களுக்கும், ஆங்கிலேயர்களுக்கும் 1751ல் நடந்த போரில், ஆங்கிலேயர்கள் தோல்வி அடைந்தனர். ஜாகீர்தாரர்கள் இக்கோட்டையை தலைமையிடமாக்கி ஆட்சி செய்ததும், பின் சந்தாசாகிப் என்ற மன்னன், ஆட்சி செய்ததாக வரலாற்று தகவல்கள் உள்ளன. கோட்டையின் வெளிப்புற சுற்றுச்சுவர்கள், வேலுார் கோட்டை போன்று காணப்படுகிறது. மலைக்குன்றின் மேல் அமைந்துள்ள இக்கோட்டையை சுற்றிலும், எதிரிகள் ஊடுருவாமல் இருக்க, அகலமான அகழி அமைக்கப்பட்டுஉள்ளது. 44 ஏக்கர் கோட்டையின் மேல்புற தோற்றம், செஞ்சிக்கோட்டை போல கம்பீரமாக காட்சி தருகிறது. கோட்டையை சுற்றி உயர்ந்து நிற்கும் மதில் சுவரின் நான்கு புறங்களிலும் இடையிடையே பீரங்கி மேடைகள் அமைக்கப்பட்டுள்ளன. கோட்டைச் சுவர்களில், பாண்டி நாட்டுக்கான மீன் சின்னங்கள், போர்வாள்கள் செதுக்கப்பட்டுள்ளன. கோட்டையின் மேல்புறத்தில், ராணியின் அந்தப்புரத்தை ஒட்டி, நீச்சல் குளம் அமைக்கப்பட்டுஉள்ளது. மேற்புற கோட்டையில், ஆயுத கிடங்கு, போர் காலங்களில் தப்பி செல்ல சுரங்கப்பாதை போன்றவை வியப்பூட்டும் வகையில் வடிவமைக்கப்பட்டுள்ளன. கோட்டையின் உட்புறம் மசூதி, அதன் அருகிலேயே சிவன், விநாயகர் சிலைகளும் உள்ளன. இந்த கோட்டையில் இருந்து, ஏராளமான பழங்கால வரலாற்று நாணயங்கள், பீரங்கி குண்டுகள் அக்கால மன்னர்களின் பயன்பாட்டு பொருட்கள் கிடைக்க பெற்று, பாதுகாக்கப்பட்டு வருகின்றன. பெருமை வாய்ந்த இந்த நினைவுச்சின்னம், இந்திய தொல்லியல் துறை கட்டுப்பாட்டில் உள்ளது. சமீபமாக இக்கோட்டை சமூக விரோதிகளின் கூடாரமாகவும், காதலர்களின் அந்தப்புரமாகவும் மாறி வருகிறது. கோட்டையின் படிக்கட்டுகள் உட்பட பல இடங்களில் கற்கள் மற்றும் சுவர்கள் பெயர்ந்து வருகின்றன. கோட்டையின் பல்வேறு பகுதிகளில் மரக்கன்றுகள் மற்றும் செடிகள் முளைத்துள்ளன. கோட்டை நுழைவாயில் பகுதிகள், திறந்தவெளி மதுக்கூடமாகவும், திறந்த வெளி கழிப்பறையாகவும் உள்ளன. இவை, சுற்றுலா பயணியரை முகம் சுளிக்க வைக்கின்றன. பஞ்சாயத்து நிர்வாகம் சார்பில் இங்கு துப்புரவு பணிகளும் செய்வதில்லை. கோட்டையின் நுழைவாயில் பகுதியில் உள்ள சுற்றுச்சுவரில் விரிசல் ஏற்பட்டுள்ளதுடன், சுவரை சுற்றிலும் குளம் போல மழைநீர் தேங்கி நிற்கிறது. மதில் சுவர்கள் விரிசல் ஏற்பட்டு, சிதிலமடைந்து வருகின்றன. வரலாற்று சிறப்புமிக்க ரஞ்சன்குடி கோட்டையை புனரமைத்து பாதுகாக்க வேண்டும். குடிநீர், சாலை, கழிப்பறை போன்ற அடிப்படை வசதிகள் ஏற்படுத்த வேண்டும். பாதுகாவலர்கள், துப்புரவு பணியாளர்களை நியமிக்க வேண்டும் என, இந்திய தொல்லியல் துறைக்கும், மத்திய, மாநில அரசுகளுக்கு, வரலாற்று ஆய்வாளர்கள் கோரிக்கை விடுத்துள்ளனர். திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb

பஞ்சப்பூரில் ஒருங்கிணைந்த பேருந்து நிலையம் அருகிலேயே டைடல் பார்க் அமைக்கப்பட உள்ளது. 14.16 ஏக்கரில் ரூ.315 கோடியில் தரைத்தளம் மற்றும் 6 தளங்களுடன் டைடல் பார்க் அமைய உள்ளது. திருச்சி- மதுரை நெடுஞ்சாலையில் பஞ்சப்பூர் பகுதியில் ஒருங்கிணைந்த பேருந்து நிலையத்துக்கு அருகில் இந்த டைடல் பார்க் அமைக்கப்பட உள்ளது. இந்த டைடல் பார்க்கில் 740 கார் நிறுத்துமிடம் மற்றும் 1500 இருசக்கர வாகன நிறுத்துமிடம் அமைக்கப்பட இருக்கிறது. இந்த டைடல் பார்க் மூலம் 5000க்கும் அதிகமான வேலைவாய்ப்புகள் உருவாகும். இரண்டு கட்டங்களாக கட்டுமான பணிகள் நடைபெற உள்ளன. முதல் கட்ட கட்டுமான பணிக்கு ஏற்கனவே டெண்டர் விடப்பட்டுள்ளது. இந்நிலையில் ஜனவரி மாத இறுதிக்குள்ளேயே கட்டுமான பணிகள் தொடங்கிவிடும் என அதிகாரிகள் கூறியுள்ளனர். கட்டுமான பணிகள் சுமார் 18 மாதங்களுக்குள் முடிக்கப்படும் என்றும் தெரிவித்துள்ளனர். இந்நிலையில், திருச்சி, மதுரையில் அமைய உள்ள டைடல் பார்க்குகளுக்கு சுற்றுச்சூழல் துறை அனுமதி அளித்துள்ளது. திருச்சி_நியூஸ் செய்திகளை வாட்ஸ் அப் வழி அறிய.... https://chat.whatsapp.com/EyVod1y2hCzBwSYfdM94vb